पिंपरी चिंचवड :(ppcnews.in)
रामकृष्ण मंगल कार्यालय चौक हा परिसर वाहतुकीसाठी अत्यंत महत्त्वाचा मानला जातो. मात्र, या चौक परिसरात काही व्यावसायिकांनी थेट फुटपाथवरच स्टॉल्स उभारल्याने पादचारी आणि वाहनचालकांना मोठा त्रास सहन करावा लागत होता.
सदर ठिकाणी ‘सदगुरु मसाला दूध’ आणि ‘स्वामी आईस्क्रीम मस्तानी सेंटर’ यांसारखे विविध खाद्य स्टॉल्स थेट फुटपाथवर मांडलेले दिसून येत होते. परिणामी नागरिकांना चालण्यासाठी जागा मिळत नव्हती व त्यांना रस्त्यावरून चालावे लागत होते. त्यामुळे वाहतुकीत अडथळा निर्माण होऊन अपघाताचा धोका वाढला होता. हे अतिक्रमण विशेषतः रात्री ८ ते सुमारे १२ वाजेपर्यंत असल्याचे दिसून आले.
या अतिक्रमणाबाबत श्री. अतुल युवराज पवार, सचिव – ऑल इंडिया ह्युमन राईट असोसिएशन, पुणे जिल्हा (भारत सरकार) यांनी लेखी तक्रार ‘ड’ क्षेत्रीय कार्यालय, पिंपरी चिंचवड महानगरपालिका येथे क्षेत्रीय अधिकारी व सहाय्यक उपायुक्त अश्विनी गायकवाड यांच्याकडे केली.
तक्रारीची तत्काळ दखल घेत महानगरपालिकेच्या अतिक्रमण विरोधी पथकाने काही तासांतच कारवाई करत फुटपाथवरील अनधिकृत स्टॉल्स हटवले. या तातडीच्या कारवाईबद्दल स्थानिक नागरिकांनी समाधान व्यक्त केले असून, अशा अतिक्रमणांवर कायमस्वरूपी उपाययोजना करण्याची मागणीही केली आहे.
