पुणे:-(ppcnews.in):
केवळ पदव्यांच्या भेंडोळ्या देऊन सुशिक्षित बेरोजगारांची फौज नव्हे, तर शिक्षणाद्वारे कौशल्ययुक्त तरुणांची फळी उभी राहिली पाहिजे. हे उद्दिष्ट साध्य करण्यासाठी ‘शिका आणि कमवा’ योजनेस सामाजिक चळवळीचे स्वरूप द्यावे लागेल, असे मत राज्याचे उच्च आणि तंत्र शिक्षण मंत्री चंद्रकांत पाटील यांनी व्यक्त केले.
तरूणांची आणि विशेषतः ग्रामीण भागातील तरूणांची कौशल्ये विकसीत करण्यासाठी यशस्वी ग्रुपतर्फे विशेष प्रयत्न करण्यात येत आहे.
कुशल मनुष्यबळ ही विकसीत भारतासाठी महत्त्वाची गरज असून त्यादृष्टीने ‘अप्रेंटिसशिप सुधारणा अधिनियमः परिणाम आणि भविष्यातील वाटचाल’ या विषयावर यशस्वी ग्रुपच्यावतीने वैचारिक मंथन परिषद आयोजित करण्यात आली होती, त्यावेळी चंद्रकांत पाटील बोलत होते.
यावेळी विशेष अतिथी म्हणून सावित्रीबाई फुले पुणे विद्यापीठाच्या सल्लागार समितीचे सदस्य राजेश पांडे, प्रसिद्ध अभिनेते आणि दिग्दर्शक प्रवीण तरडे आणि यशस्वी ग्रुपचे अध्यक्ष विश्वेश कुलकर्णी उपस्थित होते.
यावेळी यशस्वी ग्रुपच्या ‘शिका आणि कमवा’ या योजनेचे ब्रँड एम्बासीडर म्हणून प्रसिद्ध अभिनेते आणि दिग्दर्शक प्रवीण तरडे यांची निवड करण्यात आल्याचे घोषित करण्यात आले.
यावेळी बोलताना चंद्रकांत पाटील म्हणाले की,
केंद्रात नरेंद्र मोदी यांचे नेतृत्व आल्यापासून शिक्षणाचा चेहरामोहराच बदलला असून व्यवसायाभिमुख शिक्षणावर अधिक भर देण्यात येत आहे. २०२० मध्ये आलेले नवीन शैक्षणिक धोरण हा त्याचाच परिपाक आहे. शिक्षणात प्रचंड लवचिकता आणून त्या लवचिकतेद्वारे विद्यार्थ्यांचा संपूर्ण व्यक्तिमत्व विकास कसा साधता येईल यावर भर देण्यात आला आहे. पारंपारिक शिक्षणासोबतच विद्यार्थ्यांमधील संशोधन वृत्ती आणि दृष्टी कशी विकसीत होईल यावर भर दिला आहे. स्ट्रार्टअप मध्ये आज महिला प्रथम, तर पुरुष द्वितीय स्थानावर आहेत. संरक्षण क्षेत्रात एक स्क्रु देखील बनवू न शकणाऱ्या भारताने आज ब्रह्मोससारखे क्षेपणास्त्र विकसित केले आहे.
यावेळी बोलताना
प्रविण तरडे म्हणाले की, ‘शिका आणि कमवा’ ही योजना ग्रामीण भागातील बांधा बांधापर्यंत पोहोचवणार आहे. ग्रामीण भागातील तरुणांना या योजनेद्वारे कौशल्याचे धडे देऊन विकासाच्या मुख्य प्रवाहात आणणे हे माझे ध्येय आहे. या योजनेची काटेकोर अंमल बजावणी करीत कौशल्याधारीत युवकांची फौज निर्माण करण्यासाठी आपल्या एकत्रित प्रयत्नांची गरज आहे.
यावेळी भारत फोर्ज लि.च्या एचआर आणि आयआर विभागाचे माजी संचालक डॉ. संतोष भावे, प्रसिध्द कामगार कायदे सल्लागार तज्ज्ञ अॅड. आदित्य जोशी आणि एनआयपीएमचे पश्चिम विभाग उपाध्यक्ष डॉ. नरेंद्र पाटील यांनी मार्गदर्शन केले.
यावेळी पुणे आणि पिंपरी-चिंचवडमधील विविध औद्योगिक कंपन्यांचे मनुष्यबळ विकास अधिकारी मोठ्या संख्येने उपस्थित होते .
कार्यक्रमाचे प्रास्ताविक यशस्वी ग्रुपचे संस्थापक आणि कार्यकारी संचालक विश्र्वेश कुलकर्णी यांनी केले. सूत्रसंचालन योगेश रांगणेकर यांनी केले.
यशस्वी ग्रुपच्या ‘शिका आणि कमवा’ या योजनेचे ब्रँड एम्बासीडर म्हणून प्रसिद्ध अभिनेते आणि दिग्दर्शक प्रवीण तरडे यांची निवड करण्यात आली असून याबद्दल प्रवीण तरडे यांचा सन्मान करताना राज्याचे उच्च आणि तंत्र शिक्षण मंत्री चंद्रकांत पाटील. यावेळी (डावीकडून) विश्र्वेश कुलकर्णी, प्रवीण तरडे, चंद्रकांत पाटील आणि राजेश पांडे.
